Schaele Wazelaer.nl betraejt Venlo

Algemein – "’t Initiatief veur ein thoèsblaad in ’t Venloos dialec is oètgezónderd de vastelaoves-blaajer en inkele algemeine thoèsblaajer, in zien soort, uniek veur Venlo. D’r is ein greujende interesse van de Venlonaere en andere minse oèt de regio naor ein gelièke oètgave in ’t Venloos dialec." Det zaet Stuf Stieffel, börger van de schaele wazel oèt de binnestad. Hae vind ‘t good det dit thoèsblaad d’r kump. "Allich kin ik eur dan ouk gaon helpe, want die woute zien mich käök onder de hand. Ofschoeën zeej toch bliej mit mich zien as ik eur help mit ’t verkièr te regele. Noow de daag korter gaon waere, kin ik mich mit dit laesblaad allich ammezere!" Of Stuf Stieffel heej ouk aan de slaag kin laes geej örges anders op dit laesblaad.

Stuf haet euverigens ein groeët probleem. Zienen hónd haet ‘m de veurige waek de kabels van de radio kepot gevraete. Ónderwièl hae zien lièfleed "Ik höf mien glaas" aan ‘t veurbereie waas veur ’t optraeje mit Ben van Verdelle, scheide ziene mezièkspeuler d’r mei oèt. "Oètgeraekend op ’t moment det ik mit mien örgel michzelf óndersteunde, begoof det dink ’t. Ik haop det d’r emus in Venlo is dae mich heejmei kin helpe, ik vervael mich de miès zónder det dink." D’r hebbe zich al ‘nne gas minse aangemeld um Stuf zien örgel te ripperaere. Hae zal dan ouk vlot waer zien naobers de oère van kóp kinne gaon speule èn zinge.

Neet allein d’n hièr Stieffel is raozend èntesjas. Mièrdere minse erkinne det ‘t veur de instandhalding van ós moodertaal ein good verlingstök kin waere um de minse in ’t Venloos te laote laeze, spraeke èn schriève euver d’n diegietale snelwaeg. D’r zien al ein aantal andere thoèsblaajer "op lièn" die in dees winse veurzeen. Ein dergelik kóntakmiddel wie de SchaeleWazelaer.nl waas d’r nog neet. De SchaeleWazelaer.nl haet de wins um oèt te greuje naor ein blièvend diegietaal laesblaad. Um dit nao te straeve zien d’r ‘nne gas middele oètgedach die de minse in kóntak bringe mit ’t Venloos en eur euver te haole ‘m zelf te gaon schriève.

Zoeë zal d’r iddere maond ein Maondverhaol te laeze zien euver ein wisselend ónderwerp of gebeurtenis van de Schaele Wazelaer. Naeve det Maondverhaol is op ‘t thoèsblaad ouk ruùmte veur schaele wazel van andere schrièvers. Ouk zal op ’t blaad de költeur in Venlo ein eige plaats kriège. Bewandel dit thoèsblaad en kóm regelmaotig truuk veur nieje verhaole of andere wazel. Doot óg waal ein paar gooje hippe aan, ’t belaof ein schoeëne wandeling te waere! Vuuël mièr ónderwerpe zien waal al bekind beej de Schaele, maar bliève nog efkes geheim! Dus hald dit dialecblaad in de gater!
Kièk intösse op de blaadwièzer veur de ónderwerpe.

Heb geej vraoge of wilt geej zelf ein beejdrage levere? Neem kóntak op mit de Schaele Wazelaer door óg berich te steure naor: schaelewazelaer@hotmail.com.

Pak de pen en schrièf mei!

Binnestad – De SchaeleWazelaer.nl is in de lóch. Vanaaf dit moment kint geej gebroèk make van ’t ièrste en insigste diegietale laesblaad in ’t Venloos dialec: de SchaeleWazelaer.nl. ’t Initiatief veur dit laesblaad is ‘nn gas maond truuk ontstaon beej de Schaele Wazelaer. D’r waas wies noow nog gen inkel laesblaad det deej waat de SchaeleWazelaer.nl geit doon. Veur óg en ouk mit óg, laeze en schriève in ’t Venloos dialec.